कौटुंबिक वादातून सेवानिवृत्त लाईनमनने उचलले टोकाचे पाऊल,

घरासमोरील विद्युत पोलला गळफास लावून केली आत्महत्या

महा घडामोडी न्यूज नेटवर्क परभणी : कौटुंबिक वादातून सेवानिवृत्त लाईनमनने टोकाचे पाऊल उचलले आहे. घरासमोरील विद्युत पोलला गळफास लावून आत्महत्या केल्याची धक्कादायक घटना परभणीच्या पाथरी शहरातील गुरजार नगर येथे घडली आहे. दुर्योधन गवई (वय ६५ ) असे गळफास घेऊन आत्महत्या केलेल्या सेवानिवृत्त लाईनमनचे नाव आहे. या घटनेमुळे आश्चर्य व्यक्त केले जात आहे.

पाथरी शहरातील गुरजार नगर येथील सेवानिवृत्त लाईनमन दुर्योधन गवई यांनी कौटुंबिक भांडणातून दोन दिवसांपूर्वी पत्नीला आत्महत्या करण्याची धमकी दिली होती. त्यानंतर त्यांनी शुक्रवारी रात्री घरासमोर असलेल्या विद्युत पोलला गळफास लावून आत्महत्या केली. आत्महत्या केल्याचा प्रकार शनिवार, २६ मार्च रोजी पहाटे पाच वाजण्याच्या सुमारास उघडकीस आला. त्यानंतर याबाबतची माहिती पाथरी पोलिसांना देण्यात आली. माहिती मिळताच पोलीस कर्मचारी घटनास्थळी दाखल झाले. पंचनामा करून पोलिसांनी मृतदेह ताब्यात घेऊन शवविच्छेदनासाठी पाथरी उपजिल्हा रुग्णालयात आणला आहे. पोलिसांकडून घटनेचा तपास केला जात आहे. तपासामधून खरे कारण समोर येणार आहे. दरम्यान घरगुती भांडणातून एका निवृत्त लाईनमनने टोकाचे पाऊल उचलत घरासमोरील विद्युत पोलला गळफास लावून आत्महत्या केल्यामुळे पाथरीत आश्चर्य व्यक्त केलं जातंय. अद्यापपर्यंत तरी घटनेबाबत गुन्हा नोंद करण्यात आला नाही.