कोरपणा कृषी उत्पन्न बाजार समितीच्या मार्केट यार्डवर शुकशुकाट; व्यापाऱ्यांच्या दारात सोयाबीन विक्रीसाठी शेतकऱ्यांची गर्दी!

चार वर्षांपासून लिलाव पद्धती बंद असल्याचा आरोप; काट्यातील तफावत, दलाली आणि चुकारे याबाबत शेतकऱ्यांच्या तक्रारी

महा घडामोडी न्यूज जिल्हा प्रतिनिधी, शेख हक्कानी, चंद्रपूर, कोरपना : कापूस, तूर, सोयाबीन आणि मिरची उत्पादनासाठी ओळखल्या जाणाऱ्या कोरपणा तालुक्यातील कृषी उत्पन्न बाजार समितीच्या कारभारावर आता प्रश्नचिन्ह उपस्थित होत आहे. बाजार समितीचे मुख्य मार्केट यार्ड कोरपणा येथे, तर उपबाजारपेठ गडचांदूर येथे आहे. मात्र, बाजार समितीच्या यार्डवर अपेक्षित वर्दळ दिसत नसताना शेतकऱ्यांना आपला शेतमाल विकण्यासाठी थेट व्यापाऱ्यांच्या दारात जावे लागत असल्याचे चित्र समोर येत आहे.

बाजार समितीचे यार्ड ओस; व्यापाऱ्यांच्या दारात शेतमाल विक्री

कोरपणा तालुका हा कापूस खरेदी-विक्रीच्या मोठ्या व्यापारपेठांपैकी एक मानला जातो. तालुक्यातील जिनिंग आणि प्रेसिंग उद्योगांमुळे येथे शेतीमालाच्या व्यापाराला महत्त्व आहे. लगतच्या तेलंगणा राज्यासह वणी आणि चंद्रपूर परिसरातील शेतकरीही आपला शेतमाल विक्रीसाठी या भागात आणतात.

अशा परिस्थितीत कृषी उत्पन्न बाजार समितीच्या मुख्य यार्डवर लिलावाची प्रभावी व्यवस्था कार्यान्वित असणे अपेक्षित आहे. मात्र, गेल्या चार वर्षांपासून लिलाव पद्धत बंद असल्याचा आरोप शेतकऱ्यांकडून केला जात आहे. त्यामुळे शेतकऱ्यांना व्यापाऱ्यांच्या ठिकाणी जाऊन शेतमाल विकण्याची वेळ येत असल्याचे सांगितले जाते.

काट्यातील तफावत आणि दलालीबाबत तक्रारी

शेतकऱ्यांच्या म्हणण्यानुसार, शेतमालाच्या वजनातील तफावत, काट्याच्या पावत्या, दलाली आणि खरेदी-विक्रीनंतर मिळणारे पैसे याबाबत वारंवार तक्रारी उद्भवत आहेत. बाजार समितीकडून व्यापाऱ्यांच्या खरेदी प्रक्रियेची नियमित तपासणी होत नसल्याचीही नाराजी व्यक्त केली जात आहे.

यापूर्वीही वजनकाट्यातील तफावतीबाबत घटना घडल्याचे सांगितले जाते. मात्र, अशा तक्रारींची अधिकृत नोंद, तपासणी अहवाल आणि त्यावर झालेली कारवाई याबाबत स्पष्ट माहिती समोर येणे आवश्यक आहे. शेतकऱ्यांना वजनाची अचूक पावती मिळणे, व्यवहारात पारदर्शकता राहणे आणि नियमांनुसार देय रक्कम वेळेत मिळणे ही त्यांची प्रमुख अपेक्षा आहे.

यार्डवर सुविधा असूनही लिलाव का नाही?

कोरपणा येथील मार्केट यार्डमध्ये लिलावासाठी आवश्यक सुविधा आणि गोदाम व्यवस्था उपलब्ध असल्याचे सांगितले जाते. असे असतानाही प्रत्यक्ष लिलाव प्रक्रिया सुरू करण्यासाठी पुरेसे प्रयत्न झाले नसल्याचा आरोप होत आहे. बाजार समितीच्या सचिवांसह सभापती आणि संचालक मंडळाने याकडे गांभीर्याने लक्ष देण्याची मागणी शेतकरी वर्गातून होत आहे.

बाजार समितीच्या कार्यक्षेत्रात खरेदी-विक्रीचे व्यवहार नियमानुसार पार पडत आहेत का, शेतमालाचे वजन योग्य पद्धतीने केले जाते का, शेतकऱ्यांकडून कोणतेही अनधिकृत शुल्क आकारले जाते का आणि व्यापाऱ्यांकडून वसूल होणाऱ्या सेसची नोंद पारदर्शकपणे ठेवली जाते का, याची चौकशी करण्याची मागणीही होत आहे.

शेतकरी संकटात; बाजार समितीच्या भूमिकेवर प्रश्नचिन्ह

एकीकडे शेतकरी उत्पादन खर्च, बाजारभावातील चढ-उतार आणि विविध नैसर्गिक संकटांचा सामना करत आहेत. अशा परिस्थितीत शेतमाल विक्री प्रक्रियेत पारदर्शकता आणि योग्य मोबदला मिळणे अत्यंत महत्त्वाचे आहे. मात्र, बाजार समितीच्या यार्डवर लिलावाची व्यवस्था प्रभावीपणे सुरू नसल्यास शेतकऱ्यांना अडचणींचा सामना करावा लागू शकतो.

त्यामुळे कोरपणा कृषी उत्पन्न बाजार समितीचे सभापती, संचालक मंडळ आणि सचिव यांनी या तक्रारींची दखल घेऊन प्रत्यक्ष परिस्थितीची पाहणी करावी, वजनकाट्यांची तपासणी करावी, खरेदी-विक्री व्यवहारांचे लेखापरीक्षण करावे आणि लिलाव पद्धत सुरू करण्याबाबत स्पष्ट भूमिका मांडावी, अशी मागणी होत आहे.

आता प्रश्न असा आहे की, कोरपणा कृषी उत्पन्न बाजार समितीच्या मार्केट यार्डवर पुन्हा लिलाव पद्धत सुरू होणार का? की शेतकऱ्यांना यापुढेही व्यापाऱ्यांच्या दारात जाऊन शेतमाल विकावा लागणार? याकडे कोरपणा तालुक्यातील शेतकऱ्यांचे लक्ष लागले आहे.