दोन कारचा भीषण अपघात; सहा ठार, चौघे जखमी, दोन गंभीर

 

दोन कारचा भीषण अपघात ; सहा ठार, चौघे जखमी, दोन गंभीर

महा घडामोडी न्युज प्रतिनिधी, सोलापूर : मोहोळ-पंढरपूर महामार्गावर दोन गाड्यांची समोरासमोर जोरदार धडक झाली. हा अपघात इतका भीषण होता की, यात सहा जण जागीच ठार झाले आहेत. या अपघातात चौघे जण जखमी झाले असून दोघांची प्रकृती चिंताजनक असल्याची प्राथमिक माहिती आहे. सदर अपघात आज सायंकाळी ५ वाजण्याच्या सुमारास झाला. या अपघातमध्ये मोहोळ शहरातील डॉक्टर पती-पत्नीचा तसेच त्यांच्या नातेवाईकांचा आणि दोन मुलांचा जागीच मृत्यू झाला आहे.

डॉ. आफरिन मुजाहिद अत्तार, डॉ. मुजाहिद अत्तार, मुलगा अरमान अत्तार, डॉ. आफरीन यांचे बंधू इरफान खान, त्यांच्या पत्नी बेनझीर इरफान खान, मुलगी अनाया इरफान खान या सहा जणांचा जागीच मृत्यू झाल्याची माहिती समोर आली आहे. तर स्कॉर्पिओ गाडीमधील राजेंद्र हुंडेकरी, रामचंद्र शेटे, मंदाकिनी शेटे हे सर्व जखमी झाल्याची माहिती आहे.

दरम्यान, अत्तार आणि खान कुटुंबातील सदस्य आपल्या नातेवाईकांकडे गेले होते. आज मोहोळला परतत असताना पेनूर जवळच्या माळी पाटी जवळ पंढरपूरच्या दिशेने जाणाऱ्या स्कॉर्पिओ गाडीची त्यांच्या कारला जोरदार धडक झाली. हा अपघात इतका भीषण होता की खान यांच्या कारचा समोरील भाग अक्षरशः चक्काचूर झाला. अपघात पाहून स्थानिक नागरिकांनी तात्काळ मदत करण्याचे प्रयत्न केले. 

पोलीस देखील घटनास्थळी दाखल झाले. त्यानंतर जखमींना सोलापुरात उपचारासाठी रवाना करण्यात आले. तर मृतांना मोहोळ शासकीय रुग्णालयात शवविच्छेदनासाठी हलविले आहे. घटनास्थळी बघ्यांची मोठी गर्दी झाल्यामुळे काही वेळासाठी महामार्गावरील वाहतूक विस्कळीत झाली होती. मोहोळ-पंढरपूर रस्त्यावरील अपघातग्रस्त वाहने व वाहतुकीला अडथळा करणारी वाहने रस्त्याच्या बाजूला काढून पोलिसांनी वाहतूक सुरळीत केली. दरम्यान, मोहोळ पोलीस याबाबत अधिक तपास करत आहेत.