पिट्टीगुडा पोलीस ठाण्याच्या हद्दीत अवैध धंद्यांचे साम्राज्य? महिलांचा संताप शिगेला; पोलीस कारवाई करणार की मूक प्रेक्षक राहणार?

गावोगावी कथित अवैध दारू व गांजाची विक्री; बोगस दारूमुळे आरोग्य धोक्यात, 

युवक व्यसनाच्या विळख्यात; नागरिकांचा संतप्त सवाल – कायद्याचा धाक नेमका कुणावर?

महा घडामोडी न्यूज जिल्हा प्रतिनिधी, शेख हक्कानी चंद्रपूर, जिवती : कायद्याचे रक्षण करण्याची जबाबदारी असलेल्या यंत्रणेच्या हद्दीतच जर कथितपणे अवैध धंद्यांचा बोलबाला होत असेल, तर सामान्य नागरिकांनी न्यायासाठी कुणाकडे पाहायचे? पिट्टीगुडा पोलीस ठाण्याच्या कार्यपद्धतीवर सध्या गंभीर प्रश्न उपस्थित होत असून, काही गावांमध्ये अवैध दारू व गांजा विक्री खुलेआम सुरू असल्याचा आरोप स्थानिक नागरिकांकडून करण्यात येत आहे. या प्रकाराकडे पोलीस प्रशासन दुर्लक्ष करत आहे की संबंधितांना अभय मिळत आहे, अशी चर्चा परिसरात रंगली असून नागरिकांमध्ये तीव्र संतापाचे वातावरण निर्माण झाले आहे.

स्थानिक नागरिकांच्या म्हणण्यानुसार, माथाडी गावाच्या मुख्य रस्त्यावर अवैध दारू विक्री सुरू असल्याचा आरोप आहे. मरकागोंदी येथे ग्रामपंचायत कार्यालयाच्या मागील परिसरातही अवैध दारू विक्री होत असल्याचा दावा केला जात आहे. नंदप्पा गावात तीन ते चार जणांकडून अवैध दारूचा व्यवसाय सुरू असल्याची चर्चा असून आंबेझरी येथेही अशाच प्रकारची विक्री सुरू असल्याचा आरोप नागरिकांनी केला आहे.

स्थानिकांचा दावा आहे की, या अवैध व्यवसायांची माहिती संबंधित पोलीस ठाण्याला असूनही ठोस कारवाई होत नसल्याने अनेक प्रश्न निर्माण झाले आहेत. कायद्याचा धाक सर्वसामान्यांपुरताच मर्यादित राहिला आहे का? असा संतप्त सवाल नागरिक विचारत आहेत.

बोगस व निकृष्ट दर्जाच्या दारूमुळे अनेक दारू व्यसनी आजारी पडत असल्याचा आरोप होत असून अनेक कुटुंबांचे संसार उद्ध्वस्त झाल्याचेही नागरिकांचे म्हणणे आहे. कमी वयातील युवक दारूच्या आहारी जात असल्याने पालक आणि महिलांमध्ये तीव्र चिंता व्यक्त केली जात आहे. गावोगावी व्यसनाचे सावट वाढत असताना यंत्रणा नेमकी काय करत आहे, असा प्रश्नही उपस्थित केला जात आहे.

या पार्श्वभूमीवर महिलांनी व नागरिकांनी पिट्टीगुडा पोलीस ठाण्याच्या हद्दीतील सर्व अवैध दारू व गांजा विक्री तातडीने बंद करून संबंधितांवर कठोर कारवाई करण्याची मागणी केली आहे. तसेच या आरोपांची निष्पक्ष चौकशी करून वस्तुस्थिती जनतेसमोर आणावी आणि दोषी आढळणाऱ्यांवर कोणतीही दयामाया न दाखवता कठोर कायदेशीर कारवाई करावी, अशी जोरदार मागणी होत आहे.

आता नागरिक प्रशासनाकडून उत्तर मागत आहेत...

• पिट्टीगुडा पोलीस ठाण्याच्या हद्दीत कथित अवैध दारू व गांजा विक्री सुरू असल्याचे आरोप होत असताना प्रत्यक्ष कारवाई का दिसत नाही?
• नागरिकांनी केलेल्या तक्रारींची पडताळणी झाली आहे का?
• युवकांचे भविष्य उद्ध्वस्त करणाऱ्या आणि कुटुंबे उध्वस्त करणाऱ्या कथित अवैध धंद्यांवर निर्णायक कारवाई कधी होणार?
• कायद्याची अंमलबजावणी करणारी यंत्रणा या आरोपांवर स्पष्ट भूमिका घेणार का?

आज हा प्रश्न केवळ अवैध दारू किंवा गांजाच्या विक्रीपुरता मर्यादित राहिलेला नाही; तर सामान्य नागरिकांच्या सुरक्षिततेचा, कायद्यावरील विश्वासाचा आणि प्रशासनाच्या उत्तरदायित्वाचाही आहे. त्यामुळे या संपूर्ण प्रकरणाची सखोल चौकशी करून वस्तुस्थिती जनतेसमोर आणणे ही संबंधित यंत्रणांची जबाबदारी आहे.