गुजरातमध्ये झुलता पूल नदीत कोसळून 60 हून अधिक जणांचा मृत्यू

 गुजरातमध्ये झुलता पूल नदीत कोसळून 60 हून अधिक जणांचा मृत्यू

महा घडामोडी न्युज नेटवर्क, मुंबई : गुजरातच्या मोरबी जिल्ह्यात नदीवरील झुलता पूल कोसळण्याची घटना घडली आहे. या अपघातात पुलावर उपस्थित असलेले अनेकजण नदीत पडल्याची माहिती समोर आली आहे.मोरबी येथील माचू नदीवरील शंभर वर्षे जुना पूल रविवारी (30 ऑक्टोबर) सायंकाळच्या सुमारास कोसळला. यावेळी पुलावर उपस्थित असलेले पर्यटक नदीत कोसळले. नदीत पडलेल्या लोकांना बाहेर काढण्यासाठी प्रशासनाकडून युद्ध पातळीवर बचावकार्य सुरू करण्यात आलं आहे.पण पूल नेमका कशामुळे कोसळला, याची नेमकी माहिती अद्याप मिळालेली नाही. या दुर्घटनेत 60 हून अधिक जणांचा मृत्यू झाला आहे.मोरबी शहरातून जाणाऱ्या माचू नदीवरील हा पूल वर्षानुवर्षे बंद होता. दिवाळीनंतर गुजराती नववर्षाला हा पूल खुला करण्यात आला होता.

दिवाळीनंतरच्या सुट्ट्या आणि रविवार असल्याने आज या पुलावर प्रचंड गर्दी जमली होती.सदर पूल हा मोरबीतील आकर्षणाचं केंद्र मानला जातो. मोरबी शहर प्रशासनाच्या वेबसाईटनुसार, हा झुलता पुल शंभर वर्षांपूर्वी बांधलेला अभियांत्रिकीचा उत्तम नमुना होता. पण काही कारणामुळे तो अनेक वर्षे बंद होता.हा झुलता पूल 1.25 मीटर रुंद असून त्याची लांबी 233 मीटर इतकी आहे. मोरबी येथील दरबारगड पॅलेस आणि लखधीरजी अभियांत्रिकी महाविद्यालय या दोन ठिकाणांना जोडण्याचं काम पुलामार्फत केलं जातं.नुकतेच मोरबीला एक वेगळी ओळख देण्यासाठी युरोपमध्ये उपलब्ध अत्याधुनिक तंत्रज्ञानाचा वापर करून हा स्विंगिंग पूल तयार करण्यात आला होता. पण काही दिवसांतच हा पूल कोसळल्याने खळबळ माजली आहे.

चौकशीसाठी पाच सदस्यीय समिती

मोरबी दुर्घटनेच्या चौकशीसाठी पाच सदस्यीय चौकशी स्थापन करण्यात आली आहे.या समितीत महापालिका आयुक्त राजकुमार बेनिवाल, गांधीनगरचे क्वालिटी कंट्रोल विभागाचे मुख्य अभियंता के. एम. पटेल, अहमदाबादच्या एल. डी. इंजिनिअरिंग महाविद्यालयाचे स्ट्रक्चरल इंजिनिअरिंग विभागप्रमुख डॉ. गोपाल टंक, रस्ते आणि इमारती विभागाचे सचिव संदीप वासवा आणि सीआयडी महासंचालक सुभाष त्रिवेदी यांचा समावेश आहे.

केंद्र आणि राज्य सरकारकडून आर्थिक मदत जाहीर

केंद्र सरकारकडून मृतांच्या कुटुंबीयांना पंतप्रधान मदत निधीतून 2 लाख रुपये तर जखमींना 50 हजार रुपयांच्या मदतीची घोषणा करण्यात आली आहे.तर राज्य सरकारनेही पीडितांना मदत जाहीर केली आहे. मुख्यमंत्री भुपेंद्र पटेल यांनी मोरबी दुर्घटनेत मृत्यूमुखी पडलेल्या लोकांच्या नातेवाईकांना 4 लाख रुपये तर जखमींना 50 हजार रुपयांची मदत घोषित केली आहे.

 "मोरबीतील पूल दुर्घटनेमुळे मला अतीव दुःख झालं आहे. जिल्हा प्रशासनाकडून येथील बचावकार्य सुरू करण्यात आलं आहे. जखमींवर आवश्यक ते उपचार तत्काळ करण्यात यावेत, अशी सूचना प्रशासनाला करण्यात आली आहे. याबाबत जिल्हा प्रशासनाशी मी संपर्कात आहे." मुख्यमंत्री - भूपेंद्र पटेल,गुजरात

 "मोरबी दुर्घटनेने मला प्रचंड दुःख झालं आहे. याबाबत मी गुजरातचे मुख्यमंत्री भुपेंद्र पटेल आणि इतर संबंधित अधिकाऱ्यांशी चर्चा केली. येथील बचाव आणि मदतकार्य वेगाने सुरू आहे. दुर्घटनाग्रस्तांना आवश्यक ती मदत तातडीने पोहोचवण्यात यावी." पंतप्रधान - नरेंद्र मोदी 

"मोरबीच्या दुर्घटनेने मी चिंताग्रस्त झाले आहे. माझ्या भावना आणि प्रार्थना दुर्घटनाग्रस्त लोकांसोबत आहेत. मदत आणि बचावकार्य यांच्यामुळे पीडितांना मदत मिळेल," राष्ट्रपती - द्रौपदी मुर्मू