कोराडीत साकारतोय श्रद्धेचा गगनचुंबी अविष्कार!

२०६ फुटी भव्य हनुमान मूर्तीचे काम अंतिम टप्प्यात; 
चंद्रशेखर बावनकुळे यांनी घेतला आढावा

महा घडामोडी न्यूज नेटवर्क, नागपूर : नागपूरच्या आध्यात्मिक वैभवात भर टाकणारा एक ऐतिहासिक प्रकल्प श्री महालक्ष्मी जगदंबा संस्थान, कोराडी येथे आकारास येत आहे. मध्य भारतातील सर्वांत भव्य आणि उंच अशा प्रभू श्री हनुमानांच्या मूर्तीचे बांधकाम आता प्रगत टप्प्यावर असून, राज्याचे महसूल मंत्री आणि नागपूरचे पालकमंत्री चंद्रशेखर बावनकुळे यांनी आज प्रत्यक्ष घटनास्थळी भेट देऊन कामाची पाहणी केली.

स्थापत्यकलेचा अद्वितीय नमुना: २०६ फूट उंच मूर्ती

श्रद्धा आणि भव्य स्थापत्यकलेचा संगम असलेल्या या मूर्तीची पायाभरणी (फाउंडेशन) सह एकूण उंची २०६ फूट आहे. प्रत्यक्ष मूर्तीची उंची १६२ फूट असून हनुमंतांच्या पराक्रमाचे प्रतीक असलेली ७५ फूट उंच गदा हे या प्रकल्पाचे मुख्य आकर्षण ठरणार आहे. ही मूर्ती पाण्याच्या तलावाच्या मध्यभागी साकारण्यात येत असून, पर्यटकांसाठी तेथे बोटिंगची सुविधाही उपलब्ध करून दिली जाणार आहे.

पाहणी दौऱ्यादरम्यान मंत्री बावनकुळे यांनी प्रकल्पाच्या तांत्रिक बाजू समजून घेतल्या आणि कामाचा वेग वाढवण्याच्या सूचना दिल्या. त्यांच्यासमवेत नागपूरचे जिल्हाधिकारी कुमार आशीर्वाद, अधीक्षक अभियंता प्रशांत भांडारकर, प्रकल्प सल्लागार अविनाश नवरकर यांच्यासह विविध विभागांचे वरिष्ठ अधिकारी व कर्मचारी उपस्थित होते.

या प्रकल्पामध्ये केवळ मूर्तीच नाही, तर भाविकांसाठी 7D हनुमान चालीसा प्रोजेक्शन, ग्रंथालय, कौशल्य विद्यापीठ आणि ॲडव्हेंचर पार्क यांसारख्या आधुनिक सुविधांचाही समावेश आहे. हा प्रकल्प पूर्ण झाल्यानंतर कोराडी हे जागतिक दर्जाचे पर्यटन आणि आध्यात्मिक केंद्र म्हणून ओळखले जाईल, असा विश्वास व्यक्त केला जात आहे. या भव्य मूर्तीचे लोकार्पण आगामी काळात केंद्रीय गृहमंत्री अमित शाह यांच्या हस्ते होण्याची शक्यता आहे.

प्रकल्पाची ठळक वैशिष्ट्ये:

* एकूण उंची: २०६ फूट (फाउंडेशनसह)

* मूर्तीची उंची: १६२ फूट

* गदेची उंची: ७५ फूट

* विशेष आकर्षण: लेझर प्रोजेक्शन आणि वॉटरफॉल लाइटिंग