नागपूर मेट्रोच्या कंत्राटदाराला अटक; तब्बल नऊ कोटींची केली जीएसटी चोरी

 नागपूर मेट्रोच्या कंत्राटदाराला अटक; तब्बल नऊ कोटींची केली जीएसटी चोरी

(महा घडामोडी न्यूज नेटवर्क) नागपूर :  नऊ कोटींची जीएसटी चोरी करणाऱ्या मेसर्स प्रतिभा सीएसएल सुधीर कन्स्ट्रक्शन्सच्या एका संचालकाला मुंबई झोनच्या सीजीएसटी विभागाने शुक्रवारी अटक केली. या कंपनीला नागपुरात ट्रेन डेपो बनविण्याचे कंत्राट मिळाले होते.

  महाराष्ट्र मेट्रो रेल कॉर्पोरेशनने २०१६ मध्ये या कंपनीला मेट्रो ट्रेन डेपोचे कंत्राट दिले. त्यावेळी कंपनीने ८.०५ कोटी रुपयांचा जीएसटी भरणा केला नव्हता. त्यामुळे कंत्राट मिळाल्याच्या दोन वर्षांनंतर म्हणजेच २०१८ मध्ये ही रक्कम वसूल करण्यात आली. तसेच बनावट कागदपत्रे सादर करून तब्बल ९५ लाखांचा इनपुट टॅक्स क्रेडिट (आयटीसी) मिळविल्याचे पुढे आले आहे. याप्रकरणी अटक करण्यात आलेल्या संचालकाला शुक्रवारी वाशी न्यायदंडाधिकाऱ्यांपुढे हजर करण्यात आले.

   न्यायदंडाधिकाऱ्यांनी आरोपीला चौदा दिवसांची न्यायालयीन कोठडी सुनावली. याप्रकरणी गुन्हा सिद्ध झाल्यास पाच वर्षे तुरुंगवासाची तरतूद आहे. गेल्या काही दिवसांपासून जीएसटी विभागाच्या मुंबई झोनतर्फे करचुकवे तसेच बनावट कागदपत्रे सादर करून आयटीसी मिळविणाऱ्यांविरुद्ध विशेष धडक कारवाई सुरू आहे. या अंतर्गत आतापर्यंत ४१५ कोटींची करचुकवेगिरी उघडकीस आली आहे. यातील १८.६३ कोटी वसूल करण्यात आले आसून दहा जणांना अटक करण्यात आली आहे. डेटा आणि नेटवर्क अॅनालिसिमुळे ही मोहिम आतापर्यंत यशस्वी ठरली आहे.

पाच महिन्यात ६३० कोटी वसूल

गेल्या पाच महिन्यांचा विचार करता एकूण ५५०० कोटींची करचुकवेगिरी उघडकीस आली आहे. यातील ६३० कोटी वसूल झाले असून ४७ जणांना अटक झाली. यासंदर्भात नुकीतीच सीजीएसटी मुंबई झोन आणि महाराष्ट्र राज्य जीएसटी प्राधिकरणातील वरिष्ठ अधिकाऱ्यांची बैठक झाली. त्यामध्ये करचुकविणाऱ्यांविरुद्ध कृती योजना तयार करण्याचा महत्त्वपूर्ण निर्णय घेण्यात आला.

माहिती घेऊन कार्यवाही करू

मिहान आणि हिंगणा येथील डेपो बनविण्याचे काम मेसर्स प्रतिभा सीएसएल सुधीर कन्स्ट्रक्शन्सला देण्यात आले होते. मात्र, जीएसटी चोरीशी महामेट्रोचा प्रत्यक्ष संबंध नाही. या प्रकरणाची सविस्तर माहिती घेऊन पुढील कार्यवाही करण्यात येईल, अशी माहिती महामेट्रोचे उपमहाव्यवस्थापक (कॉर्पोरेट कम्युनिकेशन) अखिलेश हळवे यांनी दिली.