स्वयंपाकास उशीर झाल्यानं पतीचं राक्षसी कृत्य; डिझेल ओतून पत्नीला जिवंत जाळलं

 स्वयंपाकास उशीर झाल्यानं पतीचं राक्षसी कृत्य; डिझेल ओतून पत्नीला जिवंत जाळलं

(महा घडामोडी न्यूज नेटवर्क) पुणे : पुण्यानजीक असणाऱ्या पिंपरी चिंचवड परिसरातील नेहरूनगर याठिकाणी नात्याला काळीमा फासणारी धक्कादायक घटना समोर आली आहे. येथील एका तरुणानं आपल्या पत्नीसोबत क्रूरतेचा कळस गाठला आहे. स्वयंपाक बनवण्यास उशीर झाल्याच्या कारणातून आरोपीनं पत्नीच्या अंगावर डिझेल ओतून तिला जिवंत जाळण्याचा प्रयत्न केला आहे. या धक्कादायक घटनेत पीडित महिला गंभीर जखमी झाली असून तिच्यावर उपचार सुरू आहेत.

हेही वाचा : रामटेक-पंचाळा रोडवरील पंचाळा शिवारात, शेतात लावलेल्या विजेचा शॅाक लागून बिबट्याचा मृत्यू

या प्रकरणी पिंपरी चिंचवड पोलीस ठाण्यात गुन्हा दाखल करण्यात आला असून आरोपी पतीला बेड्या ठोकण्यात आल्या आहेत. बाबू ऊर्फ राहुल विठ्ठल पारधे असं गुन्हा दाखल झालेल्या 28 वर्षीय आरोपी पतीचं नाव आहे. तो पिंपरी परिसरातील नेहरूनगर येथील रहिवासी आहे. 28 वर्षीय महिलेच्या फिर्यादीवरून गुन्हा दाखल करण्यात आला आहे. या घटनेचा पुढील तपास पोलीस करत आहेत. केवळ जेवण बनवण्यास उशीर झाल्याच्या कारणातून पतीने अमानुष शिक्षा दिल्याने परिसरात खळबळ उडाली आहे.

हेही वाचा : चायनीज मांजाने घेतला पुन्हा एका विद्यार्थिनेचा जीव, वणी शहरातील घटना

पोलिसांनी दिलेल्या माहितीनुसार, घटनेच्या दिवशी (शनिवारी)  स्वयंपाक बनवण्यास फिर्यादीला उशीर झाला होता. त्यामुळे संतापलेल्या आरोपीनं जेवण वेळेवर न बनवल्याच्या कारणातून आणि चारित्र्याच्या संशयातून तिच्या अंगावर डिझेल ओतून तिला पेटवून दिलं आहे. यात पीडित महिला गंभीर जखमी झाल्या आहेत. हा धक्कादायक प्रकार उघडकीस येताच पिंपरी चिंचवड पोलिसांनी संशयित आरोपी पती राहुल पारधे याच्याविरोधात कलम 307 अन्वये खुनाच्या प्रयत्नाचा गुन्हा दाखल केला आहे.

हेही वाचा : ‘तू माझ्याशी बोलत का नाही’, असे म्हणत एकतर्फी प्रेमातून अल्पवयीन तरुणीवर जीवघेणा हल्ला, आठवड्यातील दुसरी घटना