भयंकर ! १०० रुपये चोरल्याच्या संशयातून तरुणाचा निर्घृण खून ; दारू विक्रेत्याचे कृत्य

भयंकर ! १०० रुपये चोरल्याच्या संशयातून तरुणाचा निर्घृण खून; दारू विक्रेत्याचे कृत्य

महा घडामोडी न्यूज जिल्हा प्रतिनिधी मीनाताई राहिंज,औरंगाबाद : शहरातील पुंडलीकनगर पोलीस ठाणे हद्दीत अवघे १०० रुपये चोरल्याच्या संशयातून एका १८ वर्षीय तरुणाचा दारू विक्रेत्याने लाकडी दांड्याने मारहाण करून खून करून मृतदेह कचऱ्यात फेकल्याची धक्कादायक घटना समोर आली आहे. शेख अश्फाक उर्फ मुक्या शेख अब्दुल (१८, रा. बंबाटनगर) असे मृताचे नाव आहे. तर शेख मुबारक उर्फ बाबा शेख हैदर (३८, रा. गल्ली क्र. १६, आनंदनगर) असे मारेकऱ्याचं नाव आहे.

अधिक माहिती अशी की, मृत अश्फाक हा घरातील बिकट परिस्थितीमुळे परिसरातील मुबारक उर्फ बाबाकडे गेल्या सहा वर्षांपासून अवैध दारू दुकानाच्या दुकानावर काम करायचा. तर अश्फाक हा सतत पैसे चोरत असल्याचा संशय बाबाला होता. त्यामुळे बाबा सतत त्याला मारहाण करत असे. दरम्यान बुधवारी पुन्हा बाबाने अश्फाकला १०० रुपये चोरल्याच्या संशयावरून दुपारी, सायंकाळी आणि रात्रीच्या वेळी मारहाण केली. तर रात्री लाकडी दांड्याने केलेल्या मारहाणीत एक घाव वर्मी लागल्यामुळे अश्फाकचा जागीच मृत्यू झाला. त्यानंतर बाबाने दोन मुलांच्या मदतीने अश्फाकचा मृतदेह दुचाकीवर ठेवत कारगिल मैदानातील कचऱ्याच्या ढिगाऱ्यात आणून टाकला.

२७ हजारांच्या उधारीमुळे ठेवलं कामाला....

अश्फाकच्या वडिलांना बाबाचे २७ हजार रुपये देणे होते. ते देण्याची मागणी बाबा त्याच्या वडिलांकडे करीत होता. पैसे देऊ शकत नसल्यामुळे अश्फाकला दारूच्या अड्डयावर काम करण्यास लावत होता. तसेच २७ हजार रुपये देण्याचा बाबा नेहेमीच तगादा लावायचा त्यातूनच ही हत्या झाल्याचाही आरोप करण्यात येत आहे.